कै.लक्ष्मीबाई तापकीर यांच्या पुण्यस्मरण दिनानिमित्त शालेय स्पर्धा व अभिवादन कार्यक्रमाचे आयोजन

        कै लक्ष्मीबाई तापकीर यांच्या नवव्या पुण्यस्मरण दिनानिमित्त भाऊसाहेब तापकीर प्राथमिक विद्यामंदिर या शाळेमध्ये विविध स्पर्धांचे उद्घाटन साई मल्हार सोशल फाउंडेशन चे अध्यक्ष मल्हारीशेठ तापकीर यांच्या हस्ते करण्यात आले.

 विद्यार्थ्यांना शिक्षणाबरोबर कला क्षेत्राची आवड व्हावी यासाठी चित्रकला स्पर्धेचे आयोजन करण्यात आले. बालवर्ग ते चौथीच्या विद्यार्थ्यांसाठी रंगभरण स्पर्धा तर पाचवी ते सातवीच्या विद्यार्थ्यांसाठी चित्रकला स्पर्धा ठेवण्यात आल्या होत्या. विद्यार्थ्यांनी आकर्षक चित्रे काढून उपस्थितांची मने जिंकली.

                  विद्यार्थ्यांच्या विचारांना चालना मिळण्यासाठी व त्यांच्यात विचार करण्याची प्रवृत्ती निर्माण होण्यासाठी निबंध स्पर्धेचे आयोजन करण्यात आले होते विद्यार्थ्यांनी समाज जागृती तसेच आई या विषयावर निबंध लिहून त्यांचे विचार प्रकट केले.

            

        दिनांक 14 डिसेंबर रोजी सकाळी आठ वाजता कै लक्ष्मीबाई तापकीर यांच्या प्रतिमेस पुष्पहार घालून वकृत्व स्पर्धेचा शुभारंभ करण्यात आला. रूपाली खोत, आदित्य जाधव, प्रगती जाधवर, आकांक्षा इप्पर, भूषण धुप्पे या विद्यार्थ्यांनी विविध विषयावर भाषण करून त्यांच्यातील सभाधीटपणा मुद्देसूद मांडणी व भाषाशैली यांची चूणुक दाखवून दिली. परीक्षक म्हणून शाळेतील शिक्षिका उल्का जगदाळे यांनी परीक्षण केले.   रितेश चौधरी या विद्यार्थ्याने म्हणलेल्या  या आई या कवितेवर उपस्थितांचे डोळे पाणावले.

          

          शाळेतील विद्यार्थ्यांनी अस्मिता अवचार हिच्या सुमधूर गायनाने कार्यक्रमाची सांगता करण्यात आली. अभिवादन कार्यक्रमानंतर सर्व विद्यार्थ्यांना खाऊचे वाटप करण्यात आले.कार्यक्रमाचे सूत्रसंचालन भटकर मॅडम यांनी केले तर सर्व उपस्थित पाहुण्यांचे व पालकांचे आभार शाळेच्या प्रभारी मुख्याध्यापिका जयश्री पवार यांनी मानले.

.